In ku dhow 80 dal ayaa ku baaqay Axaddii in “midnimada dhuleed” ee Ukraine ay noqoto aasaaska heshiis nabadeed oo lagu soo afjarayo dagaalka laba sano jirsaday ee u dhexeya Ruushka iyo Ukraine, inkasta oo qaar ka mid ah waddamada soo koraya ee muhiimka ah aysan ku biirin shir ka dhacay Switzerland. Jidka loogu talagalay diblomaasiyaddu weli ma cadda.
Haddana Waxaa yaab ah in madaxweynaha Soomaaliya Xasan Shiikh uu joogay maalintii sabtida dalka Switzerland.sida ay sheegtay wakaaladda wararka ee AP.
War-murtiyeedka wadajirka ah ayaa soo gabagabeeyey shir laba maalmood socday oo ay ka maqnaayeen Ruushka, kaas oo aan la casuumin.
Dagaalka ba’an ee tan iyo markii Madaxweyne Vladimir Putin uu ku duulay Ukraine bishii Febraayo 2022 wuxuu dilay ama dhaawacay boqolaal kun oo qof, wuxuu qalqal galiyay suuqyada alaabada sida hadhuudhka iyo bacriminta, wuxuu ka barakiciyay malaayiin dadkooda, wuxuuna kala qaybsanaa Reer Galbeedka – kuwaas oo cunaqabateeyay Moscow – iyo Ruushka, Shiinaha iyo qaar kale oo waddamo ah.
Qiyaastii 100 wafdi, oo badankoodu ahaayeen waddamada Reer Galbeedka, ayaa ka soo qaybgalay shirkan oo lagu tilmaamay tallaabo ugu horreysa ee nabadda loo qaaday. Waxaa ka mid ahaa madaxweyneyaasha iyo ra’iisul wasaarayaasha Faransiiska, Jarmalka, Ingiriiska, Japan, Poland, Argentina, Ecuador, Kenya iyo Soomaaliya. Wakiil ka socday Vatican-ka ayaa sidoo kale ka qaybgalay, waxaana ku hadlay Madaxweyne Ku-xigeenka Kamala Harris oo u hadashay Mareykanka.
