Saynisyahannadu waxay sameeyeen daahfur muhiim ah oo DNA ah taas oo ka caawin karta daawaynta mid ka mid ah kansarka ugu dhimashada badan dunida.
Koox cilmi-baarayaal ah oo ka socda Ingiriiska iyo Maraykanka ayaa ogaaday in kansarka ku dhaca ganaca uu awood u leeyahay inuu xiro unugyada ku jira mid ka mid ah hiddo-wadayaasha ugu muhiimsan jirka, taasoo ka caawinaysa cudurka inuu si degdeg ah u koro oo u faafo.
Kansarka ganaca ku dhaca waa kansarka 12aad ee ugu badan adduunka, iyadoo in ka badan nus milyan qof laga helo sannad kasta. Waa heerarka ugu hooseeya ee laga badbaado dhammaan noocyada ugu halista badan ee cudurkaan.
Dhimashada faraha badan ee kansarka ganaca ayaa cilmi-baarayaasha walwal ku haysay laakiin helitaanka cusub wuxuu siinayaa rajo in la helo daaweyn baabi’in karta cudurka.
Dr. Maria Hatziapostolou, oo ka tirsan Xarunta Cilmi-baarista Kansarka ee John van Geest ee Jaamacadda Nottingham Trent, ayaa tiri: “cilmi-baaristaan waxay bixisay faham iyo aqoon cusub oo ku saabsan sida kansarku u dhaqmo, waxay rajaynaysaa inay caawiso sameynta daaweynta cusub ee mustaqbalka.”
Waxay intaas ku dartay: “Kansarka ganaca wuxuu leeyahay heerka badbaado ee ugu hooseeysa dhammaan 20-ka nooc ee kansarka ugu badan. Badbaadada bukaanada in ka badan shan sano waxay si aad ah u yar tahay mudo dheer, sidaas darteed aad ayay muhiim u tahay inaan helno siyaabo cusub oo aan si wanaagsan u fahamno cudurkan, sida uu u faafo iyo sababta uu u yahay mid aad u xun.”
Kansarka ganaca inta badan waxaa lagu ogaadaa farsamo heer sare ah maanta oo daaweyntu waa kuwo xadidan, in ka badan kala bar bukaannada waxay dhintaan saddex bilood gudahood marka la ogaado. Dadka caanka ahaa ee cudurka u dhintay waxaa ka mid ahaa Alan Rickman, John Hurt, Steve Jobs iyo Patrick Swayze.
Cilmi baarista oo lagu qoray wargeyska Gastro Hep Advances, waxaa lagu tibaaxay hannaanka caafimaad iyo kansar ganaca. Waxay ogaadeen in kansarka ganacu uu kiciyo habka loo yaqaan DNA methylation, taasoo keenta in unugyada ku jira hiddo-wadayaasha HNF4A oo asal ahaan faa’iido leh ay damiyaan ama xiraan taasoo u ogolaanaysa burooyinka inay si aad ah u koraan.
Hiddo-wadayaasha HNF4A waa mid muhiim u ah caafimaadka aadanaha sababtoo ah waxay ka caawisaa in qaar badan oo ka mid ah xubnaha jirka ay si sax ah u shaqeeyaan. Laakiin cilmi-baarayaashu waxay tilmaameen in kansarka ganaca uu si qarsoodi ah u curyaamin karo faa’iidooyinka hiddo-wadayaasha.
